Хәзер кош-корт үрчетүчеләр гади һәм мулат үрдәкләрен чала башлады. Розалия Ибраһимова социаль челтәрдәге сәхифәсендә үрдәкне вак йоннарыннан арындыру ысулын тәкъдим итә.
«Үрдәкне пешеклисе кайнап торган суга 1 уч чәй содасы салып сүндереп алырга кирәк. Бер шырпысы да калмый, булса да бик тиз чыга. Кайнар судан алгач, үрдәкне пакетка салып 3-5 минут тотып алырга. Менә, чиста бит, тиз дә булды», – дип, фотолары белән бүлешкән ул.
Матур вә симез үрдәк түшкәләрен күрүчеләр «сорты нинди» һәм «бигрәк әйбәт булган, нәрсә ашаттыгыз» дип кызыксынган.
«Сода үрдәккә сеңмиме?» – дип кайгыручыга: «Сеңми, эшләп карадым шул ысул белән быел, ап-ак була», – дип җавап биргән авыл кызы.
«Бу ысулны белми идем, шулай эшлим быел. 4 индоүрдәкне чалып карадык, бик әйбәт булды», – дип язган берәү.
«Эх, алданрак куйган булсагыз, чистый этләндем 2 көн буе шырпылы, бала йонлы үрдәк йолкып», – дип зарын язган икенчесе.
«Мин 1 чиләк суга 1 уч сода салдым. Пакетта озак тотмаска, алайса кызарып китә. Мин 3-4 үрдәкне курткага гына урап салам», – дип тә киңәш бирүче бар.
Үрдәкнең йонын тиз генә чистарту ысулларын монда карарга була.
Казның йонын ничек тиз һәм дөрес йолку ысуллары турында монда укый аласыз.
Фото: © Розалия Ибраһимова