Урамда уйнап йөргән нәни баланы бөркет чукып үтергән

Эфиопиянең көнчыгышындагы Гашамо авылында яшәүче кешеләргә бөркет һөҗүм иткән. Бу турыда ВВС сайтына сылтама белән РЕН ТВ каналы хәбәр итте.

Ерткыч кош һөҗүменнән соң ике кеше яраланган, бер бала һәлак булган.

Мәрхүм баланың анасы сүзләренчә, сабый бу вакытта урамда уйнап йөри. Шуннан соң ул кычкыра башлый. Әнисе өйдән йөгереп чыга. Бу вакытта бөркет баланы җиргә егып салган һәм чукып маташа.

"Мин йөгереп килдем, бөркеткә таяк ыргыттым", - дип сөйли бу хатын.

Биредә бөркетләр бик еш һөҗүм итә башлагач, полиция махсус режим керткән. Алар хәзер агрессив бөркетләрне урында ук атып үтерә ала.