Уралдагы Елань авылында өч бала янып үлгән
Биш баланың 31 яшьлек анасы гел салгалап йөри. Балаларны әле күптән түгел генә әниләренә кире кайтарган булганнар.
Свердловск өлкәсенең Талицкий районындагы Елань авылында 5 апрельгә каршы төндә зур янгын була. Фаҗигадә өч бала янып үлә. Коточкыч янгын сәбәпләрен тикшерүчеләр, прокуратура һәм полиция хезмәткәрләре ачыклый. Бу турыда «Комсомольская правда» хәбәр итте.
Янгында 2 яшьлек кыз, 5 яшлек малай һәм 8 яшьлек малай һәлак була. 8 яшьлек һәм 10 айлык ике малайны шаһитлар коткара. Бу турыда Гадәттән тыш хәлләр министрлыгының Свердловск өлкәсе буенча идарәсенең матбугат хезмәте хәбәр итте.
Балаларның анасы һәм үги әтисе имгәнми. Әлеге гаилә хисапта тора, үги әтиләрен кыйнау һәм алимент түләмәгән өчен хөкем иткән булганнар. Бу турыда Россия Эчке эшләр министрлыгының Свердловск өлкәсе буенча идарәсенең рәсми вәкиле Валерий Горелых сөйләгән.
«КП-Екатеринбург» хәбәрчесе авылдашлары белән сөйләшкән.
«Кызганычка, бу гаилә турында бер яхшы сүз ишеткәнем булмады. Аларның балаларын берничә тапкыр алып киттеләр инде. Менә әле шушы көннәрдә генә кабат кайтарганнар иде. Гел эчтеләр, андый тормышта ни булганын үзегез күз алдына китерәсездер инде», — ди күршеләре.
Биш бала анасы 31 яшьлек Ксения биредәге интернат-мәктәптә укыган. Авылдашлары сүзләренчә, ул еш кына салгалап йөри, балаларын тиешенчә карамый.
Өйдә янгын турында хәбәр итә торган җайланма да була. Бу турыда Талицкий районы прокуратурасы хәбәр итә.
