Унсигез яшьлек футболчы матч вакытында үлгән
Егетнең баш миенә кан сауган дип фаразлыйлар.
Мәскәү өлкәсендәге Орехово-Зуева шәһәрендә «Знамя труда» командасы футболчысы Никита Сидоров икенче тайм вакытында уенга чыга. Биш минуттан аңын югалтып егыла һәм үлә.
Уенчы янына табибны чакыралар. Уенны карап утырган әтисе дә йөгереп килә. Реанимобиль дә чакыралар. Ярты сәгать буе егеткә җан кертү өчен тырышалар, әмма табибларның тырышлыгы нәтиҗәсез кала, дип хәбәр итә «360» телеканалы.
Егетнең ни өчен үлгәне билгеле түгел. Аның баш миенә кан сауган дип фаразлыйлар.