Унике яшьлек малай супергерой булыр өчен иллеләп магнит кисәге йоткан
Ул шулай итеп тәненә металл әйберләрне ябыштырып булачак дип уйлаган.
Британиядә 12 яшьлек малай 54 данә магнитлы шарчык йоткан. Шулай итеп ул суперсәләткә — үзенә металл предметлар ябыштыру осталыгына — ия булырга җыенган. Бу турыда medialeaks.ru басмасына сылтама белән РЕН ТВ хәбәр итте.
Манчестерда яшәүче Райли Моррисон шарсыман магнитларны учлап йота. Тик супергерой сәләте генә барлыкка килми. Дүрт көннән соң бала эксперименты турында әнисенә сөйләп бирергә мәҗбүр була. Ул вакыйганы йомшартыбрак сурәтли, ике шарчык кына йотуын әйтә, махсус эшләвен дә яшерә.
Әни кеше улын табибка алып бара һәм рентген сурәтләрен күргәч, шок халәтенә килә. Балага ашыгыч рәвештә операция ясыйлар.
«Мин төгәл санны ишеткәч, телсез калдым. Башта докторлар 25 яки 30 данә дип уйлаган иде, операциядән соң 54 булуы ачыкланды», — ди бу хатын.
Операция алты сәгать булган, ул уңышлы узган. Ләкин бу очрактан соң малай озак вакыт күңеле болганудан интеккән, диелә хәбәрдә.
