Красноярск краеның Кириково авылында 44 яшьлек ир-ат югалу турында 4 сентябрьдә полициягә хәбәр итәләр. 9 сентябрьдә аны урманда табалар. Ир-ат мәетендә көч кулланып үтерү билгеләре була. Җинаять эше ачыла. Бу турыда Россия Тикшерү комитетының Красноярск крае буенча Тикшерү идарәсе хәбәр итте.
Үтерүдә шикләнеп, мәрхүмнең дустын кулга алалар.
Тикшерү версиясе буенча, 3 сентябрьдә Кириково авылында яшәүче 2 ир-ат урманда умарталыкта хәмер эчеп утыра. Умартлык ир-атларның берсенеке була. Аннары хуҗа өйдә йокыга китә. Уянгач, ул умарталары янында ир-ат йөрүен күреп ала. Эңгер-меңгер чакта, исерек килеш, умартачы дустын танымый һәм аның башына 2 тапкыр утын агачы белән суга.
Икенче көнне иртән умартачы җинаять эзен яшерергә маташа. Ул утын агачын яндыра, мәрхүмнең башына пакет кидерә, мәетне тент белән төрә. Аннары Галанино-Пировское юлының 50нче километрында урманга илтә.
Умартачы авылга кайта һәм, дустым умарталыкта югалды, дип сөйли.
Аны тоткарлаганнар, сорау алганда, ир-ат гаебен танып күрсәтмә биргән, диелә хәбәрдә.