Умартачы Фәйрүзә Кариева: «Тормыш иптәшем вафат булгач, бу эшне ташларга күңелем бармады»

Күп кеше умартачылыкны ир-атлар эше, дип саный. Әмма Азнакай районы Уразай авылында гомер итүче Фәйрүзә Кариева моның киресен исбатлый – ул үзенең тырышлыгы белән умартачылыкны гына түгел, ә үз тормышын да башкаларга үрнәк булырдай алып бара.

Тормыш иптәшем Газинур белән бергә күп еллар бу эшне алып бардык. Ул вафат булганнан соң, умартачылыкны ташларга күңелем бармады. Бу безнең тормышның бер өлеше иде. Хәзер мин аны үзем дәвам иттерәм, – ди Фәйрүзә ханым.

Бу сүзләрдә генә дә аның эшкә булган мәхәббәте, үз юлыннан туры атлавы ачык күренә. Бу эш аның өчен гади керем чыганагы гына түгел, бу – аның күңел тынычлыгы, истәлекләр, тормыш юлы.

Умартачылык бит бал җыю гына түгел. Вакытның күп өлешен алып тора торган, көн саен игътибар, күзәтү, төрле кирәк-яракларны әзерләүне таләп итә торган, табигать белән тыгыз бәйләнгән, катлаулы һәм җаваплы хезмәт.

Фәйрүзә ханымның көне бик иртә башлана: умарталарны тикшерә, аларның хәлен күзәтә, кирәкле эшләрне башкара.

Умартачы өчен һәр көн үзенчәлекле: бер көнне бал кортлары тыныч, икенче көнне алар тынгысызлана – Фәйрүзә ханым һәр умартаны аерым күзәтә, аларның тавышына, хәрәкәтенә игътибар итә.

Умартачының эше моның белән генә дә бетми: бал кортларын сакларга, тукландырырга, дәваларга, кайгыртырга кирәк. Һәр умартаның үзенчәлеге бар, ди Фәйрүзә ханым: берсе тизрәк үсә, икенчесе азрак бал бирә, өченчесе исә күбрәк игътибар сорый.

Бу тарих исә умартачылыкта ир-ат һәм хатын-кыз эше дигән бүленү булмауның бер мисалы. Фәйрүзә ханым мисалында күрәбез: теләк һәм тырышлык булса, һәрбер эшне башкарып чыгарга мөмкин.

Чыганак: «Азнакай хәбәрләре», Миләүшә Фазлыева.