Ульяновск шәһәрендә бер хатынны, аның 11 һәм 15 яшьлек кызларын фатирда атып үтергәннәр

Ульяновск өлкәсендә бер хатынны һәм аның ике кызын үтергәннәр. Бу җинаятьне Әлмәт кешесе кылган дип шикләнәләр. Бу турыда "Татар-информ"га үз чыганакларыннан билгеле булды.

Тикшерү мәгълүматлары буенча, 25 декабрьдә Ульяновск шәһәренең Заволжский районындагы йортларның берсендә фаҗига була. Фатирда 48 яшьлек хатын, аның 11 һәм 15 яшьлек ике кызының мәете табыла. Аларны атып үтергәннәр. Биредә тагын бер ир-ат мәете дә табыла. Аның шәхесе әлегә билгесез. Ульяновскида яшәүче 17 яшьлек егетнең иңбашы яраланган, аны хастаханәгә китергәннәр», — дип сөйләгән Ульяновск өлкәсе буенча Тикшерү комитеты идарәсе җитәкчесенең өлкән ярдәмчесе Евгений Словцов.

Агентлыкка үз чыганакларыннан билгеле булганча, әлеге гаиләне Әлмәттә яшәүче ир-ат үтергән булуы ихтимал. Ул — мәрхүмә хатынның туганы.

Башлангыч мәгълүматлар буенча, Әлмәт кешесе хатынны һәм аның ике баласын атып үтерә. Ул 17 яшьлек егетне дә атып яралый. Шуннан соң бу кеше үз-үзенә кул сала.

Урында тикшерүчеләр эшли. Алар фаҗиганең сәбәпләрен ачыклый, диелгән әлеге хәбәрдә.