Укытучыга пычак белән ташланган, сыйныфка ут төрткән егет ни өчен шулай эшләгәнен әйтте
Башкортстан буенча Тикшерү комитеты җинаять кылуда шикләнелгән 17 яшьлек яшүсмерне “ике яки аннан да күбрәк затны куркыныч ысул белән үтерергә җыену” маддәсе буенча тоткарлаган.
Бүген Стәрлетамакта 1нче номерлы мәктәптә тугызынчы сыйныф укучысы пычак белән укучыларга һәм укытучыга ташланды, сыйныфка ут төртте, үз-үзенә кул салырга тырышты, дип хәбәр иткән идек.
Мәктәптә өч олы кеше, бер бала яраланды. Аларны хастаханәгә озаттылар.
Соңрак бу егет җинаять эшләвенең сәбәбен аңлатты, дип яза "Башинформ". Ул сыйныфташларын күптәннән күрә яратмаган инде. "Мин, гомумән, мәктәпне күралмыйм. Мин бөтенесен дә былтыр ук суярга җыенган идем. Соңгы тамчы - әни компьютерда уйнауны тыйды. Ул компьютер аркасында минем башым бозыла дип исәпли. Мин аралаша торган кешеләрне ошатмый. Ул минем хәбәрләремне укып чыккан. Шуннан соң мин карарымны тормышка ашырырга булдым", - дигән 17 яшьлек егет.