Укытучы һәм укучылар утырган мәктәп автобусы капланган

Башкортстанның Учалы районында балалар утырган мәктәп автобусы юл кырыена төшеп капланган. Бу турыда «Башинформ» агентлыгы хәбәр итте.

1 февральдә 9нчы сыйныф укучылары, рус теле һәм әдәбияты укытучысы утырган автобус Ахун авылыннан Буйда авылына кайтып бара. «ПАЗ» автобусы белән 66 яшьлек ир-ат идарә итә. Салонда тугыз бала, укытучы һәм машина йөртүче үзе була.

Учалы-Ахун-Карагай юлының 16нчы километрында автобус йөртүче идарәне югалта һәм транспорт юл кырыена төшеп каплана. Авариядән соң, салондагы кешеләр алгы тәрәзәдән урамга чыга.

Юл һәлакәте булган урынга тиз арада ашыгыч ярдәм килә. 43 яшьлек укытучы, 9нчы сыйныфта укучы 15 яшьлек кыз баланы хастаханәгә озаталар. Аларның хәле стабиль дип бәяләнә, тормыш өчен куркыныч юк.

Машина йөртүчене алкотестер белән тикшерәләр. Аның канында алкоголь табылмый.

«Авариядән соң, балаларны озата барган хатын-кыз, ике бала медицина ярдәме сораган. Автобус балаларны мәктәп өйләренә озата барган. Укучыларның куркынычсызлык каешын эләктергән булуы билгеле», — дип сөйләгән ЮХИДИ вәкиле.

Учалы хастаханәсенә өч баланы һәм олы кешене алып килгәннәр. «Тикшергәннән соң, укытучыны һәм бер укучыны хастаханәгә салдылар. Авариядә булган кешеләр белән психолог эшли. Медицина ярдәме сорап мөрәҗәгать итмәгән алты укучы янына табиблар бригадасы китте. Аларны өйдә тикшерәләр», — дип сөйләгәннәр Башкорстан буенча Гадәттән тыш хәлләр министрлыгында.

Әлеге вакыйганы прокуратура тикшерә башлаган.