Укучы баланы трамвайдан куып төшергән кондуктор эшеннән алынган

Магнитогорскида укучы кыз баланы трамвайдан суык урамга куып төшергән кондуктор эшеннән куылачак. Бу хакта "Маггортранс" компаниясе хәбәр итә.

13 яшьлек кыз бала мәктәптән кайтып килә. Ул 35нче номерлы трамвайга утыра. Кыз кондукторга илле сум акча бирә. Тик бу акча ертылган була. Шуннан соң кондуктор баланы трамвайдан куып чыгара. Кыз әтисенә шалтырата. Ата кеше эшеннән сорап китә һәм трамвай депосына барып шикаять яза.

Кызның әтисе бу вакыйга турында «74.ру» порталына сөйли. «Кызым авырып китте. Аңа 13 яшь. Хатыным мәктәпкә шалтыратып әйткәч, баланы соңгы дәрестән җибәрделәр. Кызым Энгельс тукталышына килгән. Трамвай да килеп җиткән. Кызым трамвайга утырган һәм юлга түләү өчен илле сум акча биргән. Кондуктор акчаны алмаган. «Мондый купюраны кассада алмыйлар» дип, баланы трамвайдан төшереп калдырган», — дигән ул.

"Маггортранс" инцидент өчен гафу үтенә. Кондуктор юл йөрү өчен түләү кабул итү инструкциясен бозган, моның өчен ул эшеннән алыначак", - дип язган Магнитогорск мэриясе матбугат хезмәте.

Кондукторларның бригадиры һәм цех начальнигы премиядән азат ителгәннәр. "Бөтен хезмәткәрләр белән профилактик сөйләшү уздырылачак", - диелә хәбәрдә.

Бу хәлне Тикшерү комитеты да ачыклый.