Икеләтә шатлык: олы уллары махсус хәрби операциядән кайткан, кече улларының баласы туган
Социаль челтәрләрдә кулына чәчәк тоткан, үзе култык таягына таянган хәрбинең видеосы таралды.
«Интертат» ачыклаганча, ул Питрәч районының Пимәр авылы егете Ришат Галәвиев икән. Егет Украинадан махсус хәрби операция зонасыннан кайткан. Ул башта Тау Иле урта мәктәбенә башлангыч сыйныф укытучысы булып эшләүче әнисе янына керә. Ришат үзе дә бу мәктәпне тәмамлаган.
Видеода күренгәнчә, хәрби култык таягына таянган һәм кулына чәчәк бәйләме тоткан килеш мәктәп коридорыннан бара. Аны мәктәптә укытучылар һәм укучылар каршы ала. Ниһаять, сыйныфтан әнисе чыга, 3 ай күрешмәгән ана белән ул кочаклаша. Аннары Ришатны туган авылы Пимәрдә үз йортларында әтисе каршы ала.
Рәмзия белән Рашат Галәвиевлар 2 ул һәм 1 кыз үстергән. Бу көнне алар икеләтә шатлык кичергән. Олы уллары Ришат махсус хәрби операция зонасыннан кайткан, ә икенче улларының баласы туган, һәм алар «әби-бабай» статусына ия булган.
