Украинада Алсу Сөнгатуллинаның улы белән хезмәт иткән егет һәлак булган
Максимны соңгы юлга озатырга хезмәттәшләренең әти-әниләре дә килгән.
Махсус операциядә җырчы Алсу Сөнгатуллинаның улы Айрат белән бер взводта хезмәт иткән Югары Ослан егете Максим Татьянкин һәлак булган. Аны бүген туып-үскән авылы Шелангада соңгы юлга озатканнар. Хушлашу мәрасимендә хезмәттәш егетләренең әти-әниләре дә катнашкан.
«Айрат Максим белән Казанда өйрәнүләр вакытында ук танышкан иде. Дуслашып киттеләр, махсус операциягә җибәрелгәч тә бер взводка эләктеләр. Айрат Максим турында «бик акыллы, тәрбияле егет» дип сөйли иде. Шуңа да улыбызның дустын озатырга бармыйча булдыра алмадык. Якыннарының кайгысын уртаклашабыз. Максимның урыны оҗмах түрләрендә булсын. Инде калганнары исән-имин туган өйләренә әйләнеп кайтсыннар”, - дип сөйләде Алсу Сөнгатуллина «Интертат» хәбәрчесенә.
Максимны соңгы юлга озатканда, хәрбиләр ул хезмәт иткән 7нче рота флагын тотып барганнар. Каберенә әти-әниләр салган венок исә - Максимга хезмәттәшләреннән соңгы истәлек…
