«Уйнагыз, гармуннар!», мотофест, Рәистән тальян: Республика көне ничек узды

Рөстәм Миңнеханов Республика көне белән котлады

«Кадерле дуслар! Сезне чын мәгънәсендә халык бәйрәме – Татарстан Республикасы көне уңаеннан тәбрик итәм. Аны Татарстанда дус һәм тату яшәүче төрле милләт һәм дин вәкилләре, шулай ук республикабыздан читтә фидакарьләрчә хезмәт итүче, эшләүче һәм укучы якташларыбыз бәйрәм итә. 30 августта, кайда булуыбызга карамастан, һәрберебезнең күңелен туган җирне ярату һәм аның өчен горурлык хисләре били.

Татарстанда яңалыкка омтылыш зирәк акылга нигезләнә: традицияләргә тугрылык саклаган хәлдә, без кыю башлангычларга да юл бирәбез һәм шуңа да алга барудан тукталмыйбыз. Республиканың җиңүләре ул – һәрберебез үзеннән өлеш кертә торган, җайга салынган эш нәтиҗәсе.

Бәйрәм уңаеннан сезгә чын күңелдән бәхет, сәламәтлек, күңел күтәренкелеге һәм иминлек телим! Татарстан Республикасы көне мөбарәк булсын!» – диелгән котлауда.

Туфан Миңнуллин яшәгән йортларның берсенә мемориаль такта куелды

Туфан Миңнуллин яшәгән йортларның берсенә – Толстой урамының 16А адресындагы йорт диварына мемориаль такта куелды. Мәскәү скульпторы Рим Акчурин ясаган истәлек тактасына Туфан аганың карашы, кульязмалары да, ул туган Кама Тамагы районы табигате панорамасы да сыйган.

«Туфан абый һәр кешедә үзенең ниндидер бер эзен калдырган. Бер җөмләдә зур фикерне аның кебек бер кеше дә әйтә алмый – минем өчен ул шушы ягы белән күңелдә калды. Без аны истә тотабыз, истә тотачакбыз. Бүген, җыелып, шушы истәлек тактасын ачабыз. Хәерле сәгатьтә!» – диде мемориаль тактаны ачу тантанасында Татарстан Республикасы Рәисе Рөстәм Миңнеханов.

Татарстан Язучылар берлеге рәисе Ркаил Зәйдулла чыгышын Туфан Миңнуллины Тукай белән чагыштырудан башлады. «Чөнки Тукайның «мин коеп куйган шагыйрь генә түгел, мин дипломат та, җәмәгать эшлеклесе дә, публицист та» дигән сүзләре бар. Туфан ага да шундый киңкырлы шәхес иде», – диде ул.

«Туфан абыйны мин зур әдип, остаз буларак кына искә алмыйм. Ул милләт язмышы белән яшәде, әдәбият язмышы белән яшәде. Әдәбиятның киләчәге өчен борчылып, безгә үгет-нәсыйхәт тә укый иде. Без кайчагында сиңа тиң дә түгелбездер, кайчагында син бездән канәгать тә түгелсеңдер, ләкин без синең юлдан барырга һәм синең хыялларыңны тормышка ашырырга тырышабыз», – дип өстәде халык шагыйре.

Туфан Миңнуллин белән бергә данлыклы Щепкин студиясен тәмамлаган Татарстанның һәм Россиянең халык артисты Равил Шәрәфиев чыгышын аның белән бергә укыган чакларын искә алудан башлады. «Туфан республикага кирәк иде, артистларга кирәк иде. Марсель Сәлимҗановка ул бигрәк тә зур күчтәнәч булды. Туфан, драматург булып, үзен республикага гына түгел, илгә танытты. Халык аны ярата иде», – дип йомгаклады ул чыгышын.

Туфан Миңнуллинның кызы Әлфия Миңнуллина әйтүенчә, истәлек тактасының нәкъ шушы йортка куелуы бик сөенечле. Ул Республика җитәкчелегенә, Язучылар берлегенә һәм истәлек тактасы куйдыру инициативасы белән чыккан күршеләре Игорь белән Мариягә рәхмәтләрен җиткерде.

«Истәлек тактасының нәкъ шушы йортның диварына куелуы – безнең гаиләгә бик тә күңелле хәл. Чөнки әти шушы йортта иң куанычлы, актив иҗат елларын яшәде. Алар бирегә 2001 елның ахырында күчкәннәр иде, 2012 елга кадәр шушында яшәделәр. Күршеләребез дә бик шәп иде. Бу йорт миңа хәзер дә якын. Әтинең иҗатын яратыгыз! Театрга йөрегез! Халкыбыз яшәсен!» – диде ул.

Васил Шәйхразыев: «Горурлык белән алга барырга насыйп булсын»

Бүген Казанда 40 нчы мәртәбә «Уйнагыз, гармуннар» фестивале үткәрелде. Халыкны Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев сәламләде. Ул Татарстан Республикасы Рәисе Рөстәм Миңнеханов исеменнән тәбрикләүләрен ирештерде.

«Россиянең 20 өлкәсеннән 700дән артык гармунчы, катнашучылар бирегә җыелды. Казан сезне бәйрәм көнендә генә түгел, һәрвакыт көтә. 26-28 август көннәрендә дөнья буйлап сибелеп яшәүче халкыбызны җыйган «Милләт җыены» узды. Без татарлар – шундый халык. Яңгыр ява икән – рәхәт, бәхеткә, дибез. Кояш чыга икән – шулай ук бәхеткә, дибез. Горурлык белән алга барырга насыйп булсын», – дип ассызыклады чыгышы вакытында Васил Шәйхразыев.

Алга таба алдынгыларга дәүләт бүләкләрен һәм Рәхмәт хатларын тапшыру тантанасы булды. Чара ансамбльләр чыгышлары белән дәвам итте.

Рөстәм Миңнеханов «Ике Кремль» мотофестивалендә катнашты

Казанда Шәһәр һәм Республика көнен бәйрәм итүгә багышланган «Ике Кремль» мотофестивале узды. Катнашучылар арасында Татарстан Рәисе Рөстәм Миңнеханов та бар иде, ул «Урал» мотоциклында 1 Май мәйданыннан алып Игенчеләр сараена кадәр барды.

Биредә бәйрәмдә катнашучыларны һәм кунакларны фестивальнең махсус әзерләнгән мәйданчыгы көтә иде. Чарада бөтен илдән җыелган мотоциклчылар һәм безгә дус илләрдән килгән байкерлар катнашты.

Көндезге мотошоу-программа Бөек Ватан сугышында Җиңүнең 80 еллыгын бәйрәм итүгә багышланган иде. Фестиваль кунаклары өчен бик күп активлыклар (җанлы музыка, сугыш чоры мотоцикллары күргәзмәсе, Бөек Ватан сугышы эпизодларын интерактив реконструкцияләү, шулай ук мотошоу һәм байкерлар арасында ярышлар) әзерләнде.

Фестиваль Мәскәүнең «Кызыл мәйдан» мотоклубы инициативасы белән үткәрелә. Клубта катнашучылар имин хәрәкәт итүне, юл хәрәкәтендә катнашучыларга ихтирамлы мөнәсәбәтен күрсәтә, һөнәри белем алуга һәм мотоциклда йөрү күнекмәләрен даими рәвештә арттыруга басым ясый.

Искәртеп үтәбез: «Ике Кремль» мотофестивале Казан өчен шәһәр һәм Республика көнен бәйрәм иткәндә традицион вакыйгага әверелде. Ул инде җиденче тапкыр уза, һәм анда катнашучылар саны елдан-ел арта.

Рөстәм Миңнеханов «Уйнагыз, гармуннар!» фестиваленнән видео күрсәтте

Татарстан Рәисе Рөстәм Миңнеханов Telegram-каналында Республика һәм Шәһәр көнендә Казанда узучы «Уйнагыз, гармуннар!» фестивалендә төшерелгән видео урнаштырды.

«Шәп!» – дип шәрехләде республика җитәкчесе 1 Май мәйданында күргәннәрен.

Рөстәм Миңнеханов һәм Татарстан мәдәният министры Ирада Әюпова иҗат коллективлары белән аралашты, алар башкаруында классик көйләр һәм заманча аранжировкалар яңгырады, дип билгеләп үтә ТР Рәисенең матбугат хезмәте.

«Уйнагыз, гармуннар!» – Татарстан һәм Россиянең төрле төбәкләрендәге гармунчылар һәм үзешчән фольклор коллективларының бәйрәм йөреше ул. Фестиваль беренче тапкыр 1985 елда уздырылды, шуннан бирле ул ел саен үткәрелә.

«Уйнагыз, гармуннар» фестивале

Камал театрының элекке бинасы (Татарстан урамы, 1 нче йорт) янындагы мәйданда ХХХХ «Уйнагыз, гармуннар!» халык иҗаты фестивале булды. Соңыннан гармунчылар парады Бауман урамы буйлап Казан Кремленә кадәр барды.

Рөстәм Миңнеханов «Уйнагыз, гармуннар!» парадында катнашучыга тальян гармун бүләк итте

Бүген Казанда «Уйнагыз, гармуннар!» Республика халык иҗаты фестивале 40 нчы тапкыр узды. Татарстан Республикасы һәм Россия Федерациясе төбәкләре гармунчылары һәм үзешчән фольклор коллективлары Республика көне уңаеннан бәйрәм йөрешендә катнашты. Алар Бауман буйлап Казанның 1 Май мәйданына күтәрелделәр.

«Биредә 700 гармунчы тупланган. «Уйнагыз, гармуннар!» «Түгәрәк уен» үзешчән татар фольклор иҗаты фестивале белән бергә үрелеп бара, шуңа без аларны да бирегә чакырдык. Төрле өлкәләрдә яшәүче милләттәшләребезне бер мәйданчыкка тупладык», – диде тележурналист, «Уйнагыз, гармуннар!» телетапшыруының авторы һәм алып баручысы Айзилә Батырханова.

Соңрак Казан Кирмәне янында гармунчыларны һәм үзешчән фольклор коллективларын Татарстан Республикасы Рәисе Рөстәм Миңнеханов та сәламләде. Ул гармунчылар парадындагы яшь катнашучы Максат Мостаевка тальян гармун бүләк итте. Максат – Пермь крае мәктәпләренең берсендә IX сыйныфта укый, төрле мәдәни чараларда актив катнаша.

«Казан» гаилә үзәге янында Республика көненең төп концерты

Бүген монда Алсу – Азат Фазлыевлар, Анастасия Макарова, Татьяна Буланова һәм «Хор Турецкого» чыгыш ясый, концерт традицион рәвештә салют белән тәмамланачак.