Уфада яшәүче 21 яшьлек кызны вәхшиләрчә үтереп, чүп пакетлары белән төреп куйганнар
Яшь кыз 24 мартта югалган булган.
Уфада яшәүче 21 яшьлек Диана К. 24 мартта өеннән чыгып киткән һәм әйләнеп кайтмаган, аның телефоны да эшләмәгән. Социаль челтәрләрдә кызның югалуы турында хәбәрләр таралган. 30 мартта кич белән Диананың туганнары коточкыч хәбәр җиткерә. Кызның мәетен 24 яшьлек таныш егетенең фатирында тапканнар. Бу турыда «Комсомольская правда» хәбәр итте.
«Ул аның сөйгән егете түгел иде. Алар дуслар, танышлар. Диана аның фатирында нишләгәнен дә белмибез. Алар ни өчен бәхәсләшкәне дә билгесез. Ләкин ул аны үтергән. Унике тапкыр пычак кадаган, аннары мәетне чүп түгә торган пакетлар белән төреп куйган. Үтерүче кызның картасындагы бөтен акчаларын алган һәм качып киткән», — дип сөйли мәрхүмәнең туганы.
Диананың күпләгән туганнары һәм дуслары яшь кыз үлеменә ышана да алмый. Алар барысы да кызны бик мәрхәмәтле, ачык һәм игелекле дип искә ала.
«Башинформ» агентлыгы хәбәр иткәнчә, җинаятьтә шикләнелүче егет Азәрбайҗанда туып-үскән. Ул кызны 25 мартта берничә тапкыр пычак кадап үтергән. Җинаять арендага алынган фатирда булган. Тикшерү комитеты вәкиле үтерүдә шикләнелүче кешене тоткарлануын хәбәр иткән.
«Хәзерге вакытта җинаятьчене эзләү төгәлләнде, тикшерүчеләр җинаятьнең сәбәпләрен ачыклый», — дип аңлатканнар «Башинформ» агентлыгына ведомствода.
«Үтерү» маддәсе буенча җинаять эше ачылган.