Уфада яшәүче ир-атны сөйгән кызы аркасында үтереп, мәетен тураклаганнар. Бу турыда «Башинформ» хәбәр итте.
Әлеге җинаять Яңа ел алдыннан була. Якынча белешмә буенча, 36 яшьлек ир-атны сөйгән кызының элеккеге егете үтергән. Аннары мәетне тураклап, пакетларга тутырган.
27 декабрьдә югалган ир-атны 3 атна чамасы эзлиләр. Аның югалуы турында игезәк туганы полициягә хәбәр итә.
Берничә көннән ачыкланганча, югалган ир-ат күптән түгел генә яңа кыз белән очраша башлый. Хокук саклаучылар аны сораштыра, кызның элеккеге сөйгән егете белән дә сөйләшәләр. Шуннан соң элеккеге сөйгән егет барысын да сөйләп бирә. Ул көндәшен көнчелек аркасында үтергәнче кыйнавын әйтә. Кыз бу турыда белгәнме – бу әлегә билгеләнмәгән, диелә хәбәрдә.
