Бүген Уфада «Салават Юлаев» командасы һөҗүмчесе, 21 яшьлек хоккейчы Родион Әмировны соңгы юлга озаталар.
Вакытсыз арабыздан киткән яшь спортчы белән саубуллашырга «Уфа-Арена» боз сараена республика хөкүмәте әгъзалары, «Уфа» футбол, «Торос» хоккей клубы, Родионны талантлы уенчы буларак белгән башка спорт коллективлары вәкилләре һәм меңләгән кеше килгән.
Родион Әмировның җәсәден залдан алып чыкканда, халык спортчыны алкышларга күмгән, хоккейчылар кәшәкәләрен шакылдатып хөрмәтләгән. Хоккейчы белән хушлашу мизгелләрен төрле социаль челтәрләргә куйганнар.
Родион Әмиров Ишимбай районының Богдановка авылында җирләнәчәк.