Уфада танылган галим фаҗигале һәлак булган
Вил Өметбаев нефть скважиналарында эшләү ысулларын өйрәнгән.
Уфада 83 яшьлек академик Вил Өметбаевны машина таптаган. Галим хастаханәдә вафат була. Бу турыда Уфа.Онлайн хәбәр итте.
Биредәге ЮХИДИ белешмәсе буенча, 11 декабрьдә көндезге уникеләр тирәсендә «Хендай» машинасы җәяүлене бәрдерә. Ир-ат ярамаган урыннан юл аша чыгып бара торган була.
Өлкән яшьтәге галим имгәнә, аны хастаханәгә алып китәләр. Тик табиблар аның гомерен саклап кала алмый.
Вил Өметбаев бөтен гомерен фәнгә багышлаган. Ул нефть скважиналарында ремонт-изоляция эшләренең технологиясен һәм ысулларын өйрәнгән. Ул скважиналарның геолого-техник халәтен тикшерү һәм аларны кабат эшләтү ысулларын уйлап тапкан.
Академик хезмәт юлын гади бораулаучыдан башлап, академик дәрәҗәсенә җиткән, диелә хәбәрдә.