Уфада морг түбәсеннән ишелгән кар астында ике хатын һәм бер машина калган - видео
Хатын-кызлар качып котылмакчы булса да, кар аларны аяктан еккан.
29 гыйнварда Уфада морг бинасы түбәсеннән кар ишелеп төшкән. Бу турыда «Башинформ» агентлыгы хәбәр итте.
Шаһитлар сүзләренчә, кар массасы аста басып торган ике хатын-кыз һәм бер машина өстенә төшкән.
Видеокүзәтү камералары әлеге вакыйганы төшереп алган. Анда хатыннарның йөгереп качарга маташуы күренә, ләкин кар аларны аяктан ега.
13 нче хастаханәнең судмедэкспертиза һәм патологоанатомия бүлеге урнашкан бина янында чикләү билгеләре куелмаган.
Уфаның Гражданнарны яклау идарәсенең матбугат хезмәте хәбәр иткәнчә, биредә «Лада Гранта» машинасы җимерелгән, 1963 һәм 1991 елларда туган ике хатын-кызны ашыгыч ярдәм машинасы белән хастаханәгә алып килгәннәр. Табиблар ярдәм күрсәткәч, өйгә кайтарып җибәргәннәр, диелә хәбәрдә.