Уфада 21 декабрьдә машина өстенә боз ишелеп төшкән. Тикшерү башланган. Бу турыда Тикшерү комитетына сылтама белән «Башинформ» хәбәр итте.
Якынча белешмә буенча, 21 декабрьдә кич белән парковкада тора торган машина өстенә күп катлы йорт түбәсеннән боз ишелеп төшкән. Машина рулендә 24 яшьлек кыз булган. Аның башы имгәнгән, «ашыгыч ярдәм» хастаханәгә алып киткән.
«Гадәттән тыш хәл урынын карадылар, суд-мед экспертиза билгеләнде, ул сәламәтлеккә килгән зыян дәрәҗәсен ачыклаячак. Шаһитларны, коммуналь хезмәт җитәкчеләрен һәм хезмәткәрләрен сораштыралар. Түбәдәге һәм йорт конструкцияләрендәге бозны һәм кар массаларын чистарту өчен җаваплы идарәче компания хезмәткәрләренең һәм фатир милекчеләренең гамәлләренә хокукый бәя биреләчәк», – дигәннәр ведомствода.
