Симерү дип уйлаган: Уфада 200 кг авырлыктагы ир-атның касыгыннан 20 кг лы шеш алганнар

Уфада яшәүче ир-атның касыгына үскән гигант шешне алганнар. Бу хакта «Mash Batash» Телеграм-каналына сылтама белән «Московский комсомолец» сайты яза.

Пациентның гәүдә авырлыгы 200 килограмм булган. Корсагы бик зур булгач, ул шешне күрмәгән. Инде юньләп йөри алмый башлагач кына ир хастаханәгә мөрәҗәгать итә.

Табиблар аны карый, тикшерә һәм касык өлешендә фиброма булуын ачыклый. Бу шеш 20 килограмм чамасы авырлыкта һәм үлекли башлаган була.

Ир-атка операция ясап, шешен алганнар. Хәзер инде аның хәле яхшы, өенә чыгарганнар.