14 сентябрьдә көндез Уфаның Дөм районында урамда берничә шәрә ир-ат йөргән. Алар «Орион» Иҗат сарае янында булган. Бу турыда «Башинформ» яза.
Әлеге фотолар социаль челтәрләрдә таралган. Интернет кулланучылар фикеренчә, бу кешеләр ниндидер тренинг биремен үти яисә кемгәдер теләк оттырган. Күпләр көлә, кайсыберләре тискәре карый, балалар каршында шәрә йөрүне хупламый. Челтәрдә таралган фотода да бала карап торуы күренә.
Әлеге вакыйга турында Башкортстан буенча Эчке эшләр министрлыгы комментарий биргән.
«11нче полиция бүлеге хезмәткәрләре Интернетны мониторинглаган чакта, билгесез ир-атларның шәрә йөргәне сурәтләнгән фотолар табылды. Әлеге факт буенча хәбәр теркәлде, полиция хезмәткәрләре аларның шәхесен ачыклау буенча эшли», – дигәннәр ведомствода.