Уфа егете сөйгән кызын ваннада батырып үтергәнен җиде ел узгач кына әйткән
Егет 16 яшьлек кызны үтерә, аннары балконнан фатирга керә һәм мәет тапкан булып кылана.
Башкортстанның Уфа шәһәренең Калинин районы буенча тикшерү бүлеге 30 яшьлек ир-атка карата җинаять эшен тикшереп бетергән. Ул үтерүдә гаепләнә. Бу турыда «Башинформ» хәбәр итте.
Төбәк буенча Тикшерү идарәсе белешмәсе буенча, 2014 елның августында Уфадагы бер фатирда 16 яшьлек кыз мәете табыла. Ул ваннадагы суда батырып үтерелгән. Үсмер кызның көч кулланып үтерелүе дә ачыклана. Мәетне аның сөйгән егете таба. Кыз сөйгән егетенең фатирында кунакта була. Бу вакытта егетнең әти-әнисе шәһәрдә булмый.
Егет сүзләренчә, ул өйдән чыгып китә, кызны ялгызын гына калдыра. Аннары әйләнеп кайткач, өйгә керә алмый. Аннары балконнан керә һәм кызның мәетен таба. Күршеләр егетнең сүзләрен раслый. Шулай итеп кызны үтерүчене таба алмыйлар.
2021 елда җинаять эше материалларын кабат тикшергәч, аның телефоннан сөйләшүләрен детализацияләгәч, туганнарын һәм танышларын кабат сораштыралар. Шулай итеп бу егетнең җинаятькә катнашы булуын раслый торган шаһитлар табыла. Тупланган дәлилләр басымында егет җинаяте турында сөйләп бирергә мәҗбүр була.
Тикшерү ачыклаганча, 2014 елның 9 августында бу егет өйгә кайта, ул наркотиктан исерек була. Егет белән кыз талаша, егет кызның башын ваннадагы суга тыгып, тончыктырып үтерә. Аннары фатирны бикли һәм ишек шакый башлый, күршеләрдән ярдәм сорый. Имеш, кыз аны өйгә кертми. Аннары балконнан керә дә мәет тапкан булып кылана.
Җинаять эшен тикшереп бетергәннәр, диелә хәбәрдә.