Санкт-Петербургта 1 яшьлек бала вафат булган. Кызчык берничә ай элек батарейка йоткан, ул аны уенчык эченнән табып алган. Бу турыда «Вести» каналы хәбәр итте.
Тикшерү комитеты тикшерү башлаган. Ведомство белешмәсе буенча, балага операция ясаганнар һәм эчәклегеннән батарейканы алганнар, тик ул 26 декабрьдә вафат булган.
Биредәге матбугат чаралары белешмәсе буенча, баланы 4 декабрьдә авыр хәлдә хастаханәгә китерәләр. Кыз баланың 3 ай элек уенчыктагы түгәрәк батарейканы йотуы ачыклана.
Баланың ата-анасы – Үзбәкстан гражданнары. Әтисе Россиядә рәсми рәвештә эшли һәм яши, әнисе миграция хисабында тора, диелә хәбәрдә.