Удмуртиядә вертолет һәлакәткә очраган
Вертолет Ижевск шәһәреннән 80 км ераклыкта төшкән.
Бүген көндезге икеләр тирәсендә Удмуртиядә Ми-2 вертолеты һәлакәткә очраган. Борттагы ике кеше дә исән калган. Бу турыда РЕН ТВ хәбәр итте.
Якынча белешмә буенча, вертолет өермә агымына эләккән һәм егылып төшкән. Кар булу егылуны йомшарткан, дип фаразлыйлар.
Пилот элемтәгә чыга алган. Гадәттән тыш хәлләр министрлыгы урынга коткаручылар җибәргән.
Фаҗига Ижевск шәһәреннән 80 км ераклыкта булган.
«Татар-информ» белешмәсе буенча, вертолет Казан авиапредприятиесенеке, ул көндезге уникедә Ижевск аэродромыннан чыккан. Нефть үткәргеч тирәләрен әйләнеп узарга тиеш булган.
Элемтә югалыр алдыннан, командир штаттан тыш ситуация турында хәбәр итәргә өлгергән. Урынга тикшерүчеләр һәм коткаручылар киткән.