Удмуртиядә хастаханәдә янгын чыккан
Биредә 52 кеше кислородка тоташтырылган булган.
Удмуртиянең Ижевск шәһәре хастаханәсенең коронавируслы авыруларны дәвалый торган бүлегендә янгын чыккан. Ут неврология бүлегендәне ярдәмче бүлмәдән башланган. Бу турыда РЕН ТВ каналы Удмуртия башлыгы Александр Бречаловка сылтама белән хәбәр итте.
«Бинадан 74 кешене эвакуацияләгәннәр. 52 кеше кислородка тоташтырылган булган. Аларны хастаханәнең башка катларына күчергәннәр. Егермеләп кешене учреждениенең башка корпусына илткәннәр», диелә бу хәбәрдә.
Удмуртия башлыгы Александр Бречалов Твиттерда язганча, янгын 27 октябрьдә 18.43 сәгатьтә Ижевск шәһәр хастаханәсе стационарының 7 катындагы неврология бүлегендә була. Янгынны сүндергәннәр. Зыян күрүчеләр һәм һәлак булучылар юк. 74 пациентны оператив рәвештә хастаханәнең башка бүлекләренә күчергәннәр.
