Удмуртиядә 46 яшьлек хатынны үтереп, мәетен базга күмеп куйганар
47 яшьлек ир-ат хатынын үтергәнче кыйнаган.
Удмуртиядә бер хатын мәете бер ай чамасы базда яткан. Бу турыда Россия Тикшерү комитетының Удмуртия буенча Тикшерү идарәсенең матбугат хезмәте хәбәр итте.
46 яшьлек хатынны үз йортындагы базга күмеп куйганнар. Аны үтерүдә шикләнеп ирен кулга алганнар. Можга районара тикшерү бүлеге 47 яшьлек ир-атка карата «үтерү» маддәсе буенча җинаять эше ачкан.
Ул моңа кадәр дә хөкем ителгән, Алнаш районында яшәүче кеше.
27 июньдә Алнаш районында яшәүче хатын 46 яшьлек әнисенең хәбәрсез югалуы турында полициягә гариза яза. Тикшерү эшләре барышында мәрхүмәнең җинаять корбаны булуы ачыклана. Аның мәетендә көч кулланып үтерү билгеләре була. Мәетне 3 июльдә үз өе янында — Алнаш районының Пирогово авылында Нагорная урамындагы базда табалар.
Тикшерү версиясе буенча, 12 июньгә каршы төндә бу хатынның ире — җинаятьтә гаепләнүче кеше хатыны кыйный, аннары мәетне базга күмеп куя, диелә бу хәбәрдә.
