«Учак аша сикерә». Башы, муены, гәүдәсе, аяк-куллары пешкән нәни малай реанимациядә ята

Башкортстанда бөтен тәне диярлек пешеп беткән 8 яшьлек малайны Уфадагы хастаханәнең реанимациясенә китергәннәр. Бу турыда «Башинформ» хәбәр итте.

18 мартта кич белән соң гына 8 яшьлек малайны китерәләр. Ул Иглин районында Иглин авылында яши.

Башкортстан буенча Гадәттән тыш хәлләр министрлыгы белешмәсе буенча, табиблар малайның башы, муены, гәүдәсе I, II, III дәрәҗәдә пешүен, аяк-кулларының 15 проценты пешүен, җиңелчә дәрәҗәдә шок булуын билгели.

Хастаханәгә китергән чакта аның хәле стабиль катлаулы дип бәяләнә. Аңа операция ясыйлар, ул әле дә реанимациядә ята.

«Пациент реанимациядә. Сәламәтлеге стабиль, уртача катлаулы дип бәяләнә», – дигәннәр 22 мартта Башкортстан Сәламәтлек саклау министрлыгында.

Баланың ничек пешкәне анык кына билгеле түгел. Расланмаган белешмә буенча, ул өлкәннәрдән башка, үзе генә булган чакта учак яга, аннары шул учак аша сикергәндә пешә, диелә хәбәрдә.