«Үҗәтлек, күз яшьләре, тырышлык нәтиҗәсе»: Алсу һәм Азат Фазлыевларны улы шатландырган

Иҗади гаилә Алсу һәм Азат Фазлыевларның олы улы Аяз кечкенәдән бал биюләре белән шөгыльләнә һәм җиңү арты җиңү яулый. Шушы көннәрдә Аяз әти-әнисен тагын бер уңышы белән сөендергән. Улларының сокландыргыч итеп биегән һәм зур уңыш китергән видеосын Алсу Фазлыева үзенең шәхси сәхифәсенә куйды.

«Ура! Безнең Аяз Фазлыев һәм Катя Казан Кремле Кубогы турнирының җиңүчеләре булдылар. Икешәр тапкыр беренче урын яуладылар.

Ата-ана өчен баласының уңышыннан да зуррак шатлык юктыр. Күпме үҗәтлек, көч, күз яшьләре, тырышлык, йокысыз төннәр, тренировкалар өчен матди чыгымнар нәтиҗәсе бу.

Тренерларыбызга, укытучыларыбызга, Аллаһы Тәгаләгә һәм, дисциплинаң һәм хезмәтең өчен, улыбыз Аяз, сиңа рәхмәтлебез. Горурланабыз, улым», – дип язды Алсу Фазлыева үзенең сәхифәсендә.

Аяз һәм аның бию буенча партнеры Катяның биюе дә, образлары да, чыннан да, күз явын алырлык. Сез дә бәя бирегез әле.