![Тямаев концертында бер хатын ирен кулына күтәреп алган](https://intertat.tatar/resize/shd/images/uploads/news/2024/1/25/4f9c13503aa496490af2ab7e323e0eb9.jpg)
Татарстанның иң көчле хатын-кызлары беләсезме кайда яши? Минзәләдә! Җырчы Фирдүс Тямаевның концертында булган хәл моны раслый да раслый!
Тулбай авылыннан концерт карарга килгән бер парны Тямаев башта: «Сезнең дә үбешәсегез килә что ли? Кайткач үбешерсез. Ә юк, абый, давай!» – дип, яңа кавышкан егет белән кыз кебек итеп, шәпләп үбештергән. Аннан җырчының күңеленә: «Апа, бу – точно синең ирме соң?» – дип шик кергән. Ханым исә озак уйлап тормыйча, ирен жәлт кенә кулларына күтәреп алган, шулай итеп хәләл ире икәнлеген дәлилләгән.
«12 ел концерт куеп, мондый се.. -любовьны күргәнем юк иде әле минем», – дип шаккаткан Тямай инде урта яшьләрдәге ир белән хатын арасындагы мәхәббәткә.
Фирдүснең «подписчик»лары бу видеога төрле күзлектән караганнар. Кайбер комментарийларга «хатын-кызлар нәфислек, тыйнаклык кебек сыйфатларын җуеп бара» дигән фикер салынган.
«Кая бара бу дөнья! Исем китә шундый хатыннарга»;
«Хурлык. Берсенең шушы кыланмышлары аркасында башкаларының да репутациясе төшә»;
«Акылдан язалар инде. Бер дә матур күренеш түгел»;
«Абзыйны кызартып бетерде», «Исәр», – дип язалар алар.
Икенчеләре моның Тямаев концертындагы чираттагы прикол икәнен аңлап кабул иткән
«Шаярту бит инде бу. Минем менә күтәреп караганым юк. Көчем дә җитмәс иде. Ә бу молодец, залга күпме позитив Фирдүстән дә, бу пардан да»;
«Үз ирен үбә, үз ирен күтәрә бит. Үтерәләр инде, шаяртуларны аңламыйча. Сөенергә ярамый, көләргә ярамый, бәлки, яшәргә дә ярамыйдыр»;
«Минем әти ягыннан туган апа ул. Бик матур яшиләр. Аларсыз Тулбай авылында бер генә бәйрәм дә үтми», – дип яклаганнар бу парны.