«Ты супер!» тамашасында финалга чыккан Минзәлә үсмеренә фатир бүләк иттеләр
Данила Новиковның яңа фатирында тавыш яздыру студиясе булачак.
НТВ каналында «Ты супер!» тамашасында Минзәләдә яшәүче 15 яшьлек Данила Новиков финалга кадәр барып җитте. Хәзер аңа бер бүлмәле фатир һәм тавыш яздыру җиһазлары бүләк итәләр. Бу турыда «Татар-информ» агентлыгы хәбәр итте.
«Район хакимияте ноутбук, меценатлар фатир бүләк итте. Сату-алу килешүе төзелде инде. Даниланың фатиры бар. Бу — шәһәр үзәгендә бер бүлмәле фатир, мәктәпкә дә якын, тиздән ул өй туе уздырачак», — диде Минзәлә районы советы аппараты җитәкчесе Эльвира Хәбибуллина.
Хәзер алар шәхси йортта яши. 120 квадрат метр мәйданлы өйдә Даниланың үз бүлмәсе бар.
Даниланы әбисе үстерә, әнисе авариядә һәлак булган, Данила аны хәтерләми. Әтисе исә ташлап киткән, ул Данилага ярдәм итми.
Әбисенә машина алырга хыялланучы Минзәлә үсмере «Ты супер!» тамашасында шаккатырды, дип язган идек.