Туймазы шәһәрендә, авыруга ярдәм итәргә килгәч, танылган табибны кыйнаганнар
30 ел табиб булып эшләүче хатынның башына һәм кулларына сукканнар, халатын ертканнар.
25 мартта Башкортстанның Туймазы шәһәрендә авыру янына чакыру буенча килгән терапевт-табибны кыйнаганнар. Бу турыда Башкортстанның сәламәтлек саклау өлкәсе хезмәткәрләре профсоюзына сылтама белән РЕН ТВ хәбәр итте.
Табибка авыруның туганнары һөҗүм иткән. Чакыру буенча килгән табиб медицина картасына язулар язганнан соң, картаны үзе белән алып китәргә җыена. (Карта медицина оешмасы документы булып санала.) Туганнарына бу хәл ошамый, алар табибка ташлана.
«Алар хатын-кызга ташланган, халатын ертканнар, башына һәм кулларына сукканнар», — дип сөйләгәннәр профсоюзда.
Шуннан соң профсоюз полициягә мөрәҗәгать иткән. Терапевт хатын сәламәтлегенә килгән зыянны медэкспертлар ачыклаячак.
Башкортстан буенча Эчке эшләр министрлыгы хәбәр иткәнчә, якынча версия буенча, өлкән яшьтәге авыру кешенең туганнары җәнҗал чыгарган. «Хәзерге вакытта полиция хезмәткәрләре тикшерү эшләрен башкара, шуннан соң процессуаль карар кабул ителәчәк», диелә бу хәбәрдә.
«Башинформ» агентлыгы хәбәр иткәнчә, әлеге хатын 30 ел табиб булып эшли, ул шәһәрнең мактаулы гражданины, 2017 елда республиканың иң яхшы терапевты исеменә лаек булган.