Туйдан соң бер айдан хатын ирен чәнчеп үтергән

22 декабрьдә Башкортстанның Хәйбуллин районындагы авылларның берсендә шәхси йортта 29 яшьлек ир-ат мәете табыла. Бу турыда «Башинформ» агентлыгы хәбәр итте. 

Фаҗига урынын тикшергәннән соң, бу кешене хатыны үтергәне ачыклана.

«Ир белән хатын үз өйләрендә спиртлы эчемлекләр эчеп утыра. Икенче көнне аларның өйләнешкәненә бер ай тулырга тиеш була. Табын артында утырганда яшь кияү белән кәләш талаша башлый. Алар бер-берсен хыянәттә гаепли. Талаша торгач, 37 яшьлек хатын пычак ала һәм иренең муенына берничә тапкыр кадый», — дип сөйләгәннәр агентлыкка Башкортстан буенча Тикшерү комитеты идарәсендә.

Яраланган ир-ат урамга йөгереп чыга. Күршеләренә барып җитә һәм ашыгыч ярдәм чакыруларын сорый. Ләкин бу кеше табиблар килгәнче җан бирә.

Авыр җинаятьтә гаепләнүче хатынны кулга алганнар. Аны сак астында тоту турында карар чыгарылган, диелгән әлеге хәбәрдә.