Турист хатын Байкал күле бозындагы гигант ярыкка төшеп һәлак булган

Байкал күлендә ял иткәндә турист хатын-кыз һәлак булган. Ул тимераякта шуып барганда, боздагы гигант ярыкка төшеп киткән. Бу турыда «Интерфакс» хәбәр итте.

Фаҗига 22 мартта була. Хатын-кызны башка туристлар табып ала. Башта аның рюкзагы һәм чанасы табыла. Аннары эз буенча барып, хатынның мәетен дә табалар. Коткаручылар бер сәгатьтән килеп җитә. Ләкин бу вакытта хатын җан биргән була инде.

Тикшерү версиясе буенча, 50 яшьлек турист хатын Байкал күле бозы өстеннән Большое Голоустное бистәсеннән Большие Коты бистәсенә киткән. Бу авыллар арасында ераклык 40 км чамасы була.

Төбәк буенча Гадәттән тыш хәлләр министрлыгының баш идарәсе матбугат хезмәтендә «Интерфакс» агентлыгына хәбәр иткәнчә, хатын боздагы гигант ярыкка төшеп киткән. Бу ярыкны кар каплаган булган. Шуңа күрә мәрхүмә аны күрмәгән. Ул судан үзе чыккан, ләкин салкында өшеп вафат булган.

Турист хатын Байкалда ял итәргә Воркута шәһәреннән килгән. Аның үлемен Россия Тикшерү комитетының Көнчыгыш-Себер тикшерү идарәсе тикшерә.