![Түрә: «Lada Vesta» – «депутат машинасы» дип кабул ителә башлаячак](https://intertat.tatar/resize/shd/images/uploads/news/2023/12/29/4b809e12925d4e64f909623b274b3adb.jpg)
Парламент гаражына «Lada Vesta» машиналарының бер партиясе кайткан. Бу хакта «Российская газета»га Дәүләт Думасының транспорт һәм транспорт инфраструктурасын үстерү комитеты әгъзасы Александр Толмачев («Бердәм Россия» фракциясе) сөйләгән.
Баштарак Дума Советы депутатларны Россия автомобильләренә күчереп утырту карары кабул иткән иде. Депутатларның үзләренең сайлау округларында безнең илдә ясалган машиналарда йөрүе патриотизм билгесе булачак дип көтелде.
«Әйтелде – эшләнде. Дәүләт Думасы депутатлары вазифаи эшләре буенча Россия машиналарында йөриячәк, дигән карар кабул ителеп кенә калмады, ә эшли дә», – дигән Толмачев.
Ул моны «дөрес карар» дип саный, һәм аның фикеренчә, бу – Россиядә җитештерелгән машиналарның статусын күтәрәчәк, аларны халык «депутат» машиналары дип кабул итәчәк.
«Парламент гаражына «Lada Vesta» машиналары партиясе кайтты. Минемчә, бу – дөрес карар. «Депутатларныкы» дип кабул ителәчәк Россия автомобильләренең статусын күтәрүдән тыш, бу – Россиядән киткән чит ил җитештерүчеләренә гадел җавап, – дигән Толмачев. – Алай гына да түгел, россиялеләрне дистанцион сервислардан аера торган маркаларның автомобильләрен куллану – ахмаклык, дип саныйм. Бу – клиентны мыскыл итү. Моңа түзеп торырга телисез икән – ихтыярыгыз».
Толмачев яңа «Vesta» машинасында үзе дә бик рәхәтләнеп йөриячәген әйткән.