Кичә көндез Лениногорскида Менделеев урамы янындагы сулыкта 15 яшьлек үсмер батып үлгән. Россия Гадәттән тыш хәлләр министрлыгының ТР буенча Баш идарәсе хәбәр иткәнчә, баланың гәүдәсен биш метр тирәнлектән чыгарганнар. Бу урын су коену өчен җиһазландырылмаган булган.
Әлеге факт буенча саксызлык аркасында үлемгә китерү турында җинаять эше кузгатылган. Тикшерү шәһәр прокуратурасы контролендә, дип хәбәр итә Татарстан Прокуратурасы.
Тикшерү комитеты мәгълүматлары буенча, яшүсмер күл яр буенда туп белән уйнаган. Аның тубы суга төшкән, һәм ул аның артыннан йөзеп киткән. Ул тубын алып чыга алмаган, батып үлгән.
Фото: © Россия Гадәттән тыш хәлләр министрлыгының ТР буенча Баш идарәсенең Макс каналыннан