2015 елда Омскида казарма җимерелү нәтиҗәсендә аякларын югалткан Уфа блогере Рөстәм Нәбиев Эверест тавын яулаган. Бу хакта ул социаль челтәрдәге сәхифәсендә хәбәр итте.
«20 май көнне Непал вакыты белән иртәнге 8:16да мин, Рөстәм Нәбиев, альпинизм тарихында беренче булып Эверестка кулларымда күтәрелдем.
Мин моны булдыра алдым. Мин дөньяның иң биек ноктасында. Хәзерге минутларда мин елыйм. Шатлыктанмы, исән-сау булума сөенепме, әллә инде бик нык аруданмы, белмим… Туктый алмый елыйм...
Мин бу җиңүемне мине күзәтеп барган һәр кешегә багышлыйм. Әйтәсе килгән сүзем бер генә: яшисез икән — көрәшегез! Соңгы сулышка кадәр көрәшегез!» — дип язган ул.