Һиндстанда туй кунаклары утырган автобус тарлавыктагы тирән чокырга төшеп киткән. Кимендә 25 кеше үлгән, тагын 21 кеше имгәнгән. Бу турыда «Вести» каналы хәбәр итте.
Фаҗига 5 октябрьдә иртәнге якта Дхумакот шәһәре тирәсендә була.
Автобуста 50ләп кеше бара. Урында 25 кеше мәетен тапканнар инде. 21 кешене хастаханәгә китергәннәр. Алты кешенең хәле бик авыр, дип бәяләнә.
Шушы тирәдә иртәнге якта Гималайдагы Докриани-Бомак бозлыгына менеп баручы кешеләр төркемен кар басып китә. Биредә кимендә 10 кеше һәлак була, тагын 18 кеше хәбәрсез югала, диелә хәбәрдә.
