Тугызынчы сыйныфта укучы кыз рус теленнән имтихан вакытында үлгән
Баланың йөрәк авыруы да булган, ул бик каты дулкынланган, өстәвенә эссе һава торышы да аның хәлен җибәргәндер, дип фаразлыйлар.
Төньяк Осетиянең Моздок районындагы Калинин бистәсендә мәктәптә рус теленнән Төп дәүләт имтиханы вакытында кыз бала үлгән. Бу турыда Россия Тикшерү комитетының Төньяк Осетия буенча Тикшерү идарәсенә сылтама белән «Комсомольская правда» хәбәр итте.
«24 майда иртәнге уннар тирәсендә 9 сыйныфта укучы кызның хәле китә. Аны экстрен рәвештә хастаханәгә илтәләр. Ләкин юлда барышлый ул вафат була», — дип аңлатканнар ведомствода.
Якынча белешмә буенча, баланың йөрәк өянәге булган. Ул бик арыган һәм дулкынланган. Өстәвенә эссе һава торышы, стресс та аның болай да йомшак сәламәтлегенә йогынты ясагандыр, дип сөйләгән сайт чыганагы.
Моздок районы башлыгы Олег Яровой сүзләренчә, мәрхүмә кыз 2004 елда туган, Дагыстанның Кизләр шәһәрендә 2 нче мәктәптә укыган.
Төньяк Осетиянең Мәгариф һәм фән министрлыгы хәбәр иткәнчә, бүген Калинин районында имтихан тапшыру пункты оештырылган булган. Бирегә министр вазифаларын башкаручы Людмила Башарина барган, диелә хәбәрдә.