Тугыз яшьлек малайны үз апасы урманга илтеп, киемнәрен салдыра һәм карга күмеп куя

Башкортстанда 22 яшьлек кыз 9 яшьлек энесен үтерә язган. Гаиләдә олы кыз нәни баладан көнләшеп, энесеннән котылмакчы булган. Бу турыда «Башинформ» агентлыгы хәбәр итте. 

Тугыз яшьлек малайны апасы өйдән алып чыгып китә. Балалар әни кешегә китапханәгә барабыз дип әйтәләр. Ә үзләре урманга таба китә.

Урманда бу кыз энесенең киемнәрен салдыра, телефон шнуры белән буа башлый. Шуннан соң кыз энесен кар белән күмеп куя. Бераздан кызгана башлый һәм юлга чыгара, диелгән әлеге хәбәрдә.

Юлдагы баланы узып баручылар күреп ала. Битараф булмаган ир-атлар туктый. Малайны киендерәләр, җылы итеп төрәләр һәм ашыгыч ярдәм чакыралар. Тугыз яшьлек баланың аяклары өшегән, башы имгәнгән, бәрелгән һәм тырналган эзләр була.

22 яшьлек кызның психик авыруы бар, аның үсешендә тоткарлыклар булуы ачыклана, диелгән бу хәбәрдә.