4 майда Уфада танылган шоумен Боджей Давид 42 яшендә вафат булган. Биредә алып баручы, диджей булып эшләгән. Башкорт һәм татар җырларын башкарып танылган. Бу турыда «Башинформ» яза.
Февральдә ул диабетик комага китә, 22нче хастаханәдә ята.
Мәрхүмнең дусты, танылган артист, «Башкортстан» Дәүләт концертлар залы директоры Вилдан Яруллин сүзләренчә, иптәшләре аңа ярдәм итәргә тырышкан, дәвалауны да оештырганнар, тик коткара алмаганнар.
Давидны Уфада җирлиләр.
Нигериядә туып-үскән Боджей Давид Уфада медуниверситетны тәмамлаган. Җырчы булып эшли, русча, татарча, башкортча җырлый. «Башкорт телен өйрәнәм» телепроектында катнаша.
Вәсилә Фәттахованың «Туган як» хитын үзенең иң яраткан татарча җыры дип атый, диелә хәбәрдә.