Туган апасы кыйнагач, кулсыз калган бала мәктәпкә укырга кергән
Былтыр җәй хастаханәгә китерелгән баланың тәнендә күпсанлы җәрәхәтләр, шул исәптән пешкән җәрәхәтләр, кара янган урыннар, куллары киселеп беткән була.
Ингушетиядә туган апасы кыйнап имгәткән кыз бала мәктәпкә 1 сыйныфка укырга кергән. Бу турыда Россия бала хокуклары буенча вәкаләтле вәкил Анна Кузнецовага сылтама белән РИА Новости хәбәр итте.
«Фотода безнең Айша! Аны танып та булмый инде. Ул беренче сыйныфка укырга керде. Айша Республика махсуслаштырылган үзәгендә укыячак. Аның гадәти балалар тормышы белән яши башлавына бик сөенәм», — дип яза Кузнецова социаль челтәрләрдә.
Омбудсмен сүзләренчә, бала белән әле дә психологлар шөгыльләнә, аның кулына протез кую мәсьәләсе хәл ителә.
2019 елның 4 июлендә Назрань шәһәре хастаханәсенә имгәнеп беткән 7 яшьлек кыз баланы китерәләр. Аның имгәнгән урыннары күп була: тәнендә карарлык урын булмый - күпсанлы җәрәхәтләр, шул исәптән пешкән җәрәхәтләр, кара янган урыннар, куллары киселеп беткән була. Аннары аны Мәскәүгә Рошаль хастаханәсенә күчерәләр. Август башында баланың уң кулының бер өлешен ампутацияләргә мәҗбүр булалар. Яңа ел алдыннан сабыйны клиникадан чыгаралар.
Кызның туган апасына карата җинаять эше ачыла. Россия Тикшерү комитеты мәгълүматы буенча, бала туган апасы гаиләсендә яши, тик документлары да, опека да рәсмиләштерелмәгән. Бу хатынга карата «алдан уйлап нәни баланың сәламәтлегенә зур зыян китерү» маддәсе буенча җинаять эше ачалар. аны ун елга ирегеннән мәхрүм итүләре ихтимал. Хәзер ул сак астында.
Кузнецова сүзләренчә, баланың анасын хокукларыннан мәхрүм итү турында эш туктатылган, бу хатын үз баласының рәсми вәкиле булып рәсмиләштерелгән.
- «Һәр миллиметр өчен көрәштек»: Апасы кыйнап имгәткән баланың уң кулын кисәргә туры килгән
- «Баланы күргәч хәтта табибларда да шок булды»: җәрәхәтләнгән 7 яшьлек кызның кулын кисәргә туры киләчәк