Түбән Кама районының Борок авылында сукбай этләр ике сарыкны ботарлап ташлаган. Бу турыда НТР-24 каналы хәбәр итте.
«Этләр чирүләргә берләшә, йорт ишегалларына керәләр, бәйдә торган этләребезне куркыталар, түтәлләрне таптыйлар. Тавыкларны ботарлаган очраклар булды. Хәзер сарыкларны үтергәннәр», - дип яза биредә яшәүчеләр социаль челтәрләрдә.
Башкалар да авылда сукбай этләр чирүе йөрүен раслый. Алар балалары өчен курка. «Балалар өчен куркыныч. Велосипедта йөриләр, урамда уйныйлар, ә монда көпә-көндез сукбай этләр чирүе йөри», - диләр. «Башка елларда балалар урамда йөргәндә курыкмый идек. Быел чыннан да куркыныч. Түтәлләрдә зур-зур эзләр булгалый иде. Быел бөтенләй әрсезләнделәр. Сарыкларны ботарлагач, балаларга да ташлана инде алар», диләр.
Түбән Кама районы администрациясе сукбай этләрне тоту оештырылачагын хәбәр иткән.