Татарстанның салым инспекциясендә гражданнарның кайсы категорияләре транспорт салымын түләүдән азат ителүен искә төшерделәр. Бу хакта «Челнинские известия» хәбәр итә.
РФ Салым кодексы һәм «Транспорт салымы турында» республика законы нигезендә, ташламалар түбәндәге төркемнәргә бирелә:
- радиациядән зарар күрүчеләр (шул исәптән Чернобыль АЭСындагы авариядә);
- СССР, РФ һәм Социалистик Хезмәт Геройлары, Дан һәм Хезмәт Даны орденнары кавалерлары;
- Бөек Ватан сугышында катнашучылар һәм инвалидлар, концлагерьларда балигъ булмаган тоткыннар (110 ат көченә кадәрге автомобильләр өчен);
- I һәм II группа инвалидлар (100 ат көченә кадәрге автомобильләр өчен).
Ташлама бары тик 1 транспорт чарасына гына кагыла.
Моннан тыш, 2024-2027 елларда салым җиңел электромобильләр, мотоцикллар, мотороллерлар, автобуслар һәм электр двигательләре белән җиһазландырылган йөк машиналары хуҗаларыннан алынмый.