АКШ президенты Дональд Трамп Россия һәм Украина коллегалары – Владимир Путин һәм Владимир Зеленский белән өч яклы очрашу булачагын әйтте. Украинада конфликтны көйләү турында планнарын Трамп үзенең Truth Social социаль челтәрендә хәбәр иткән. Бу турыда «Татар-информ» яза.
Трамп сүзләренчә, Зеленский һәм Европа лидерлары белән төп очрашудан соң, ул Путинга шалтыраткан. Өч яклы очрашуга кадәр ике яклы очрашу булырга тиеш – анда Россия Президенты һәм Украина лидеры катнашачак.
АКШ президенты әйткәнчә, Ак йортта очрашу вакытында «Украина өчен иминлек гарантияләре турында (аларны АКШ белән координацияләп төрле Европа илләре бирәчәк)» фикер алышканнар.
«Барысы да Россия һәм Украина өчен тынычлык мөмкинлеге өчен шат», – дигән Трамп һәм әлеге консультацияләрне «бик яхшы», ләкин «4 ел чамасы дәвам итә торган» кораллы каршылыкның тәмамлануына «иртә адым» дип атаган.
