Казахстанның Алматы шәһәрендә Новосибирскидан килгән Михаил Радуга исемле ир эксперимент уздырган. Төшләрне контрольдә тоту өчен, башына чип куйган.
«BAZA» «Телеграм» каналы хәбәр иткәнчә, ул моны өй шартларында эшләгән. Табиблар аның эш нәтиҗәләрен күргәч, башта моны өйдә берүзе эшли алганына ышанмаганнар. Әмма ир нейрохирургларның эше турында интернеттагы мәгълүматларны өйрәнгән, аннары 5 сарыкта тәҗрибә уздырган. 6нчы тәҗрибә – үзе булган. Скрепка белән тиреләрен тарттырган һәм башына чип куйган. 1 литр кан югалткан.
Ир «төшләрне контрольдә тотам» дип хыялланган, шуңа да шундый эксперимент ясаган. Җинаять куркынычы һәм башка сәбәпләр аркасында профессионалларга мөрәҗәгать итеп тормаган.
Радуга үзенең экспериментын «төш күрү өчен стимуляция ясадым» дип аңлата. Аның фикеренчә, бу ачышның зур перспективалары бар. Әмма бер дә матур төшләр күреп хисләнергә язмаган икән аңа.
Күпмедер вакыттан, чип баш миенә керә, һәм ул табибларга мөрәҗәгать итә. Оксфорд университеты консультант-нейрохирургы Алекс Грин фикеренчә, ир-ат үләргә яки инсульт кичерергә мөмкин булган, ә хәзер аңа эпилепсия куркынычы яный. Чөнки сау-сәламәт ир-ат, үзе теләп, сәламәтлеген бозган.
