Тормозы ватылган йөк машинасы яшүсмер кызны таптап үтергән - коточкыч мизгел видеога эләккән
Музыка мәктәбенә килгән бала, автобустан чыгып тукталышка баса һәм шул мизгелдә аны йөк машинасы таптап китә.
Башкортстанның Уфа районында тукталышта торган кыз бала үзбушаткыч машина астында калып һәлак булган. Бу турыда «Башинформ» хәбәр итте.
Михайловка авылының Ленин урамында булган коточкыч юл һәлакәте видеога эләккән.
Кытайда эшләнгән Shacman үзбушаткыч машинасы таудан төшеп барганда, тормозы ватылган. Идарә ителми башлаган машина «Лада Ларгус» автомобилен таптап диярлек узган. Шуннан соң зур машина капланган һәм торак йортка бәрелгән. Һәлакәт булган урындагы тукталышта торган 2006 елгы кыз бала тапталып үлгән.
Видео кадрларыннан күренгәнчә, ян кырыена ауган йөк машинасы зур тизлектә килеп, баланы очыртып диярлек алып китә.
Зур йөк машинасы һәм җиңел машина йөртүчеләре җитди имгәнгән. Аларны хастаханәгә озатканнар. Бу турыда «Юл патруле» хәбәр иткән.
Башкортстан буенча ЮХИДИ белешмәсе буенча, кыз бала музыка мәктәбенә килгән булган. Авария булыр алдыннан гына, бала автобустан чыгып тукталышка баскан.