Төркиянең танылган спортчысы һәм аның нәни улының мәетен хәрабәләр арасыннан тапканнар
Төркиянең Каһраманмараш шәһәрендә җир тетрәүдән соңгы хәрабәләрне аралыйлар. Төркиянең гандбол буенча җыелма командасы капитаны Джемаль Кютахья мәетен тапканнар. Бу турыда «Вести» каналы хәбәр итте.
Ир-атның мәете 5 яшьлек улының гәүдәсе белән бергә табылган. Спортчының һәлак булуы турында илнең гандбол федерациясе дә хәбәр итә.
«Без гандбол һәм пляждагы гандбол буенча илкүләм ир-атлар командасы капитаны Джемаль Кютахья һәм аның 5 яшьлек улы Чинарның үзләре яши торган йорт хәрабәләре арасында үле килеш табылуы турында хәбәрдән кайгырабыз», – диелә федерация хәбәрендә.
Төрек федерациясе илне югары дәрәҗәдә күрсәткән кеше турында истәлек мәңге сакланачагын әйтә һәм мәрхүмнең якыннарының кайгысын уртаклаша.
Джемаль Кютахья гаиләсенең башка әгъзаларының язмышы әлегә билгесез. Аның хатыны Пелин, Пелинның анасы Нуртен Мутлу табылмаган. Пелин дүртенче ай авырлы булган. Алар да хәрабәләр арасында калган, дип фаразлана, диелә хәбәрдә.