Төркиянең көньяк-көнчыгышында, яшен суккач, өй стенасында зур тишек барлыкка килгән. Өйдә бөтен лампочкалар шартлаган, көнкүреш техникасы җиһазлары ватылган. Бу турыда «Вести» каналы хәбәр итте.
Фаҗига Хаккари шәһәре янындагы бер авылда булган. Хуҗасы сүзләренчә, ул төнлә белән каты тавышка уянып киткән. Аннары өйдә лампочкалар шартлый башлаган, бинаны төтен баскан.
Бераздан гына хуҗалар стенада тишек булуын күреп алган. Розетка тоташтырылган бөтен электр җиһазлары янып беткән, хәтта йорт җиһазлары да ватылган.
Бәхеткә, яшен суккан бүлмәдә кешеләр булмый, гаиләдә беркемгә дә зыян килми, диелә хәбәрдә.