31 майда Төркиянең Кемер шәһәре янында туристлар утырган автобус авариягә очраган. Автобуста Россиядән килгән кешеләр булган. «Вести» каналы шул хакта хәбәр итте.
Автобус ике агачны һәм фонарь баганасын аударган. Биредә барлыгы 12 кеше имгәнгән, шуларның унбере Россиядән килгән турист. Салонда 15 кеше булган, алар кунакханәләрдән Демре шәһәренә барырга чыккан.
Автобус йөртүчесе идарәсен югалткан, юлны бүлә торган полосага чыккан һәм баганага бәрелгән.
Имгәнгән кешеләрне хастаханәгә илткәннәр. Якынча белешмә буенча, алар җиңелчә зыян күргән, диелә хәбәрдә.
